Rev 1 | MMX | STEP | Ana lovoang, ni lisilimet boro at ne Iesu Karisito, ne Moroa ga raba i min, kusu na lox ase lavasaxaruki ren mi lempanga salai mo naba vot soso mun. La ne Iesu ga riki laangelo ren kusu na vaase axasev i ri ne Jon, lasaxaruki ren,

Revelation of John 1

Lavapaase Axasep

1 Ana lovoang, ni lisilimet boro at ne Iesu Karisito, ne Moroa ga raba i min, kusu na lox ase lavasaxaruki ren mi lempanga salai mo naba vot soso mun. La ne Iesu ga riki laangelo ren kusu na vaase axasev i ri ne Jon, lasaxaruki ren, 2 la neni naba tong asu mo lempanga axap ni ga ven i. La anai, ni levelinga boro at ne Moroa, la mumu bok mo levelinga ruturun ne Iesu Karisito ga vaase i. 3 Luvukat ti mo laradi do na us na levempapaase alii, la luvukat bok tinedi di ronga na levelinga, la di mu asu levelinga ik lok keneng at na lovoang; mila levenaleng ira auret pam ti na lempanga naba vot.

Lavapaase Momo

4 Nenia ne Jon, a malagan na levelinga tinemi lavanuti leventaugu lotu mik lok at lenep silok Asia.

Letaba nabalamu la lenmila at ne Moroa nak lox eburu minimi. Neni ga nemen gano, i nemen lingina la naba vot bok melemu. La lavapaase momo bok tinemi boro at lavanuti leventoonan, mo di tu to melamgo at loxonin orong at ne Moroa, 5 la lavapaase momo bok boro at ne Iesu Karisito, neni laradi ruturun at lavapaase ruturun la neni lara avot mo ne Moroa ga lox axatu kaxat amlong i basinge lanmet, la ni lamgomgo at lavaorong silok at na lavatbung menemen.

Ne Iesu ga balamu nedik la ga lox asepmus dik basinge laxakapmek mi mo lada ren. 6 La ga lok li nedik ngan lavamaasa at Linintoo ren, kusu dik tana lok lugugu at ne Moroa, ne Temen. Ata emi asu mi ne Iesu, lisisixam mi lololos axap teren; neni naba nemen amisik. I ruturun. 7 Mina ven avukat tin. Neni mo naba vot eburu mi loxontakabu, la larabung mixin axap eburu minedi diga vaxarem i at laxaba, dinaba ven i. La limixin axap at na lavatbung menemen dinaba saxaanu mu bok ba i. La nai naba ravasu ruturun kuren. I ruturun.

8 Moroa Leeme Silok atdik ga lok keretna, “Nenia mun Lurutu Kaxat la Lumumupit at lempanga axap. Nia aga nemen gano, a nemen lingina, la anaba vot bok melemu. Nenia a lolos aleng.”

Levelinga Ri Ne Jon

9 Nenia ne Jon, neton nemi limixin mi nuunu at ne Iesu. La nenia na ap kip levesongsongot eburu minimi, la nedik eburu lavaanat at Linintoo ren, la ata tu tuxuruxun at lunuunu atdik, do nedik ata ekip tangarang mi levesongsongot.

Nenia agak lok at losoxan to Patimos, nia aga nemen go ngan laradi xokoxo mila nia aga tong asu Lagale Lavavang at ne Moroa mi levelinga ruturun at ne Iesu. 10 At lara laaleng, ni laaleng at Leeme Silok, Loroonan at ne Moroa ga suxuna ia, la aga silimet tang ka ne Iesu. La keneng at na lisilimet, aga ronga laxaka linga silok to melemu rak, gang teng ngan luru. 11 La mo laxaka linga ga lok, “Una lok kaka lugun la una malagan asu na lempanga nenu uba ven i; la una lox aonon i uto at lavanuti leventaugu lotu, tara uto Epesas, la tara uto Smena, la tara uto Pegamam, la tara uto Taiataira, la tara uto Sadis, la tara uto Piladelpia, la tara bok uto Lodisia.”

12 Aga rem gili kusu ana ven i do nege mo laradi ga paase ria, la aga ven lavanuti levenbabao gol gak lok. 13 La kantubu at nom levenbabao lara laradi ga tu go, neni ga lok ngan Laradi Mevana, ga sigaara mi lavanga singsiga baalom, la loxontamon tantanan ga is korop lobongobong teren min. 14 La lavatlak teren eburu mi levengkabinim teren gan bun aleng tinotno, ga ngan lovopaxanao i sovosok; la luxatli ren ga babao ngan laxao bokbolot. 15 La luxangkedek teren ga ngangao ngan loxonuat, no laxao i an amemeles i la laxaka linga ren ga reng ngan lenaonkaka at ladan it los ukopok. 16 At lekngen tino, neni gam tebeng lavanuti larapenti, la to at lungusno lavarise sepsep ga anan evan gak lok teren. La lemeren ga lok ngan laxangking i soosoo bobonot mi lololos teren.

17 Se nia aga ven i, aga subu saparap luxangkedek teren la nia aga met aroo. Ketla ni ga sogo tu rak mi lekngen tino, la ni ga lok tia, “Nemen gat uta marat. Nenia mun Lurutu Kaxat la Lumumupit. 18 Nenia mun lorooro. Aga met pam, ketla na nga a ruuna ka lorooro kopmen taxavaxap teren. La a ruuna bok lololos mavana at lanmet kusu ana suang lumusaragu at lanmet, la a ruuna lololos mavana at lanmet la a lok tatao lumusaragu ro Edesa.

19 Kuren la una malagan asu lempanga salai u ven pam i la lempanga salai mo naba vot melemu. 20 Levelinga alipe at lavasuun at lavanuti larapenti nenu u ven i de at lakngak tino, di lok katling lavanuti nedi lubung angelo dik lok tatao mo lavanuti leventaugu lotu. La lavanuti levenbabao gol, di ru katling nom lavanuti leventaugu lotu.”